धनगढी । कैलाली कारागारमा एक जनाको ज्यान जाने गरी भएको घटनामा जिल्ला प्रहरी कार्यालय कैलालीका प्रमुख, प्रहरी उपरीक्षक (एसपी) बालनरसिंह राणालाई हेडक्वाटर तानिएका छन् । प्रहरी प्रधान कार्यालयले बुधबार काज सरुवा गरेर एसपी राणालाई तानेकाे हो । अग्रलेखसंग कुराकानी गर्दै आफ्नो सरुवा भएको एसपी राणाले पुष्टि गरे । 

एसपी राणाको सरुवा भएपछि जिल्ला प्रहरी कार्यालय कैलालीको नयाँ प्रमुखमा केन्द्रीय अनुसन्धान ब्युरो (सीआईबी) मा कार्यरत एसपी नरेन्द्र चन्दलाई पठाइएको छ । स्रोतका अनुसार कैलाली कारागार घटनालाई लिएर एसपी राणाको सरुवा भएको हो । उनी कैलाली आएको चार महिना नपुग्दै सरुवा भएका हुन् । राणाले गत बैशाख २३ गते कैलाली प्रहरीको नेतृत्व सम्हालेका थिए ।

गएको साउन २३ गते राति कैलाली जिल्ला कारागारमा कैदीबन्दीबीच झडप हुँदा एक जनाको मृत्यु र ४७ जना घाइते भएका थिए ।

साेही घटनामा सुरक्षा समन्वयमा कमजोरी देखिएको भन्दै प्रमुख जिल्ला अधिकारी गोगनबहादुर हमाललाई साउन २८ गते नै गृहमा तानिएको थियो । उनको स्थानमा दाङका सीडीओ कृष्णप्रसाद लम्साललाई कैलाली खटाइएको छ । घटना भएकाे तीन सातापछि एसपी राणाकाे सरूवा भएकाे हाे । 

उनले बैशाख २३ गते मात्रै कैलाली प्रहरीकाे कमाण्ड सम्हालेका थिए । चार महिना नपुग्दै उनकाे सरूवा भएकाे हाे ।