काठमाडौं । नागरिक उन्मुक्ति पार्टी (नाउपा) को केन्द्रीय कार्यसमितिको बैठक संरक्षक रेशम चौधरीको तस्वीर राखेर काठमाडौंमा सुरु भएको छ । चौधरी पक्षका नेताहरूले बहिष्कार गरेको यो बैठक दुई दिनसम्म चल्नेछ । 

बैठकमा पार्टीको विधान संशोधन, केन्द्रीय सदस्य मनोनयन, निर्वाचन आयोगमा अध्यावधिक लगाएत उपनिर्वाचनका विषयमा छलफल हुने नेताहरूले जनाएका छन् । बैठकमा केन्द्रीय सदस्यका साथै संघ, प्रदेश र स्थानीय तहमा पार्टीका निर्वाचित प्रतिनिधिहरूको समेत सहभागीता रहेको छ ।

बैठकमा राखिएको ब्यानरमा एकातर्फ अध्यक्ष रञ्जिता श्रेष्ठ र अर्कोतर्फ संरक्षक रेशम चौधरी तस्वीर राखिएको छ । यसअघि पार्टीका संरक्षक रेशम चौधरी पक्षको राष्ट्रिय भेलाले अध्यक्ष श्रेष्ठलाई पार्टीको अध्यक्ष र साधारण सदस्यबाट समेत हटाएर रेशमका बुवा लालबीरलाई अध्यक्ष बनाएको थियो । तर निर्वाचन आयोगले उक्त कमिटीलाई मान्यता नदिएपछि रञ्जिता श्रेष्ठ नै अध्यक्ष कायम भएकी थिइन।

यी हुन् छलफलका ३ एजेण्डा

केन्द्रीय कमिटी बैठकमा छलफलका ३ एजेण्डा पेस भएका छन् । बैठकमा एजेण्डा पेस भएको प्रवक्ता दामोदर पण्डितले जानकारी दिए ।  उनका अनुसार समसामयिक राजनीतिक विषय, विधान संशोधन र केन्द्रीय सदस्य बढाएर अद्यावधिक गर्ने छलफलका एजेण्डा रहेका छन् । 

बैठक सम्भवतः आजै र नभए सोमबार सकिने पनि प्रवक्ता पण्डितले जानकारी दिए । उनका अनुसार निर्वाचन आयोगले रञ्जिता श्रेष्ठलाई अध्यक्षमा वैधानिकता दिएपछि असन्तुष्ट पक्ष भन्ने नै पार्टीमा नरहेको बताए । उक्त बैठकमा नाउपाका संरक्षक रेशम चौधरी भने सहभागी छैनन् ।