काठमाडौँ । पूर्व राष्ट्रपति विद्यादेवी भण्डारीले नेकपा एमालेको सक्रिय राजनीतिमा आउने घोषणा गरेकी छन् । जननेता मदन भण्डारीको ७४ औँ जन्म जयन्तीका अवसरमा शनिबार मदन भण्डारी फाउन्डेसनले आयोजना गरेको कार्यक्रममा भण्डारीले यस्तो घोषणा गरेकी हुन् ।
उनले देश र जनताको सेवा गर्ने उद्देश्यले आफूले पार्टीको सदस्यता नवीकरण गरिसकेको जनाइन् । भण्डारीले भनिन्– ‘फरक ढङ्गको राजनीतिक जिम्मेवारीबाट अलग भएपछि नेकपा एमालेमै रहेर पार्टीको राजनीतिक यात्रालाई निरन्तर दिने पवित्र उद्देश्यका साथ मैले पार्टी सदस्यता नवीकरण गरेको छु ।’
उनले अब आफू नेकपा एमालेको परिवारको सदस्यको रूपमा पुनः जोडिएको घोषणा गर्दै यसमा आफू गर्व गरेको बताइन् । उनले यसमा आफ्नो कुनै विशिष्ट लक्ष्य नभएको भन्दै देश र जनताको सेवा गर्ने एक मात्र उद्देश्य रहेको बताइन् ।
जननेता मदन भण्डारीको भनाई स्मरण गर्दै भण्डारीले जनता भगवान र राजनीतिमा थकाई नहुने बताइन् । उनले राजनीतिक यात्रामा यहाँसम्म आउँदा धेरै कुरा बुझिएको, सिकाएको र परिपक्व बनाएको बताइन् ।
तत्कालीन एमाले उपाध्यक्ष भण्डारी २०७४ को निर्वाचनपछि राष्ट्रपति बनेसँगै सक्रिय राजनीतिबाट अलग भएकी थिइन् । उनी २०७९ को निर्वाचनपछि सात वर्षे राष्ट्रपति कार्यकाल सकाएर शीतल निवासबाट निजी निवास फर्केकी थिइन् ।
साेही कार्यक्रममा प्रधानमन्त्री केपी शर्मा ओलीले नेकपा (एमाले) एकढिक्का रहेको बताएका छन्। ओलीले बाहिर जुनसुकै प्रचार भए पनि एमाले मजबुत रहेको बताएका हुन्।
'अमेरिकी राष्ट्रपति चढ्ने गाडीमा गोली हाने पनि त्यहाँ सवार राष्ट्रपतिलाई थाहै हुँदैन, गाडी आफ्नो लयमा हिँड्छ,' उनले भने, 'एमाले त्यस्तै मजबुत छ। विरोधीहरूले प्रहार गर्छ तर मजबुतका साथ आफ्नो बाटो हिँड्छ ।'
प्रधानमन्त्री ओलीले मदन भण्डारीको जन्मजयन्तीका अवसरमा कतिपयले एमाले फुट्छ भन्ने सपना देखेको पनि बताए। 'विद्या भण्डारीले बम पड्काउँनुहुन्छ,' उनले भने, 'यहीँबाट एमाले ध्वस्त हुन सुरू गर्छ भन्ने सपना देखेर बसेका छन् । कुनै बम, बारूद, गोला, केही पड्किने वाला छैन। नेकपा (एमाले) एक छ, एक रहन्छ। आश गरेर हुन्छ।'
प्रतिक्रिया