धनगढी । सुदूरपश्चिम प्रदेश साक्षर घोषणा भएको छ । प्रदेशका १५ देखि ६० वर्ष उमेर समूहका नागरिकको साक्षरता प्रतिशत ९५ प्रतिशतभन्दा माथि भएपछि प्रदेशलाई साक्षर घोषणा गरिएको हो । १५ देखि ६० वर्ष उमेर समूहका ९५ प्रतिशतभन्दा बढी नागरिक साक्षर भएको सुनिश्चित भएपछि साक्षर घोषणा गर्ने नीति रहेको छ । 

सुदूरपश्चिम प्रदेशमा १५ देखि ६० वर्षसम्मको जनसंख्या १६ लाख ८८ हजार ३४ रहेको छ । त्यसको ९६.१९ प्रतिशतअर्थात १६ लाख २३ हजार ७१९ नागरिक साक्षर रहेको शिक्षा निर्देशनालयको तथ्यांक छ । सबैभन्दा बढी साक्षर प्रतिशत (९७.३१) बाजुरामा रहेको छ भने सबैभन्दा कम अछाममा (९५.५५) रहेको छ । 

साक्षरता घोषणाको मापदण्ड पूरा भएपछि बिहीबार सामाजिक विकास मन्त्रालयको आयोजनामा धनगढीमा भएको एक कार्यक्रमकाबीच प्रदेशलाई साक्षर घोषणा गरिएको हो । साक्षर नेपाल वर्ष २०७६ को अवधारणापत्र बमोजिम प्रदेश साक्षरता अभियान समितिको असार ११ गतेको निर्णयअनुसार साक्षर प्रदेश घोषणा गरिएको शिक्षा विकास निर्देशनालय सुदूरपश्चिमका महानिर्देशकसमेत रहेका साक्षरता अभियान प्रदेश समन्वय समिति सुदूरपश्चिमका सदस्य सचिव दुर्गादत्त बिष्टले जानकारी दिए । 

बिष्टका अनुसार सुदूरपश्चिम, देशको चौथो प्रदेशका रुपमा साक्षर घोषणा भएको हो । यसअघि बागमती, गण्डकी र कोशी प्रदेश साक्षर प्रदेशको रुपमा घोषणा भइसकेका छन् । साक्षर नेपाल वर्षको अवधारणअनुसार वडा, स्थानीय तह, जिल्ला हुँदै प्रदेशलाई साक्षर घोषणा गरिएको बिष्टले बताए । सुदूरपश्चिम प्रदेशमा पहिलो साक्षर घोषणा गर्ने जिल्ला दार्चुला थियो । दार्चुला ०७२ पुस १५ गते साक्षर जिल्ला घोषणा गरिएको थियो । 

सुदूरपश्चिम प्रदेशका मुख्यमन्त्री कमलबहादुर शाहको प्रमुख आतिथ्यतामा भएको साक्षर प्रदेश घोषणा कार्यक्रममा प्रदेशका मन्त्री, राज्यमन्त्री, पूर्वमुख्यमन्त्री, प्रदेशसभा सदस्य लगायतको सहभागिता रहेको थियो ।