धनगढी । एक वर्षमै विद्यालय भवन निर्माण गरिदिने सम्झौता गर्दै ठेक्का लिएको बडातेडी डुणे कन्स्ट्रक्सन प्रालिले धनगढीमा पाँच वटा विद्यालयको भवन अझै बनाएको छैन । २०७७ पुस १४ गतेदेखि निर्माण सुरु गरेको बडातेडीले पाँच वर्षसम्म विद्यालय भवन नबनाएको हो । 

धनगढी उपमहानगरपालिका वडा नम्बर १२ जुगेडाको शारदा माविको आठ कोठे भवन निर्माण सम्पन्न नहुँदा विद्यलयले भुइँमै बसाएर विद्यार्थीलाई पढाइरहेको विद्यालयका प्रधानाध्यापक जीवन रेग्मीले बताए । ‘तल्लो तलामा एक वर्ष पहिले भित्तासम्म लगाइदिएपछि अधुरै भवनमा राखेर पढाइरहेका छौं,’ उनले भने, ‘धुलोमाटोमा राखेर विद्यार्थीलाई पढाउन गाह्रो छ ।’

४–४ कोठाको दुई तले भवन पाँच वटा विद्यालयमा निर्माण गर्न दिएको ठेक्का बडातेडीले सम्पन्न नगरेपछि धनगढी उपमहानगरपालिकाले जरिवाना लगाएको छ । तर पनि बडातेडीले विद्यालय भवन निर्माणको कामलाई तिब्रता दिएको छैन । ‘ठेकदार एक दिन मान्छे लिएर काम गर्न आउँछ, त्यसपछि महिनादिनसम्म हराउँछ,’ प्रधानाध्यापक रेग्मीले भने, ‘ठेकेदारले काम नै नगरेको कारण एक वर्षमा बन्ने भवन पाँच वर्षसम्म बन्न सकेन ।’

शारदा मावि जस्तै वडा नम्बर १२ को दुर्गा आधाभूत विद्यालय, वडा नम्बर १३ को जनता राष्ट्रिय मावि, वडा नम्बर १४ को पञ्चोदय मावि र वडा नम्बर ९ को सरस्वती आधारभूत विद्यालयको भवन निर्माणलाई बडातेडीले अधुरै छोडेको छ । धनगढी उपमहानगरपालिकाका इञ्जिनियर रोशन खड्काले सरस्वती आधारभूत विद्यालयको भवन सम्पन्न नहुँदै ठेकेदारले विद्यालयलाई हस्तान्तरण गरिसकेको बताए । उनले सो भवनको अन्तिम फिनिसिङ गरेर फाइनल बील उपमहानगरमा पेश हुन बाँकी रहेको बताए ।

दुर्गा आधारभूत विद्यालयको भवनको पनि फिनिसिङको काम बाँकी रहेको इञ्जिनियर खड्काले बताए । उनले जनता राष्ट्रिय मावि र पञ्चोदय माविमा पनि फिनिसिङ लगायतका काम बाँकी रहेको बताए । ‘बडातेडीले सबैभन्दा कम काम गरेको शारदामा हो,’ इञ्जिनियर खड्काले भने, ‘दोस्रो तला उठाउनै बाँकी छ । भुइँ तला फिनिसिङ गर्न बाँकी छ ।’

प्रतिविद्यालय भवन डेढ करोड लागत अनुमान गरिएको भए पनि बडातेडीले प्रति विद्यालय भवन सवा ८६ लाखमै बनाइदिने कबोल गरी ठेक्का हात पारेको थियो । उपमहानगरपालिकाले एउटै मितिमा बडातेडीलाई प्रति विद्यालय भवन ८६ लाख २० हजार ९५४ रुपैयाँमा रंगरोगन, इलेक्ट्रिक वर्क र फर्निचर व्यवस्थापनसहित विद्यालय भवन निर्माणको ठेक्का दिएको थियो । 

बडातेडीले समयमा काम सम्पन्न नगरेपछि उपमहानगरपालिकाले तीन पटक म्याद थप गरी २०८० असार ३० गतेसम्म म्याद दिएको थियो । तर, सो अवधिसम्म पनि काम नभएपछि उपमहानगरपालिकाले ०८० साउन १ गतेदेखि लागू हुने गरी कुल सम्झौता रकमको १० प्रतिशत जरिवाना लिएको छ । 

क्षमताभन्दा बढी ठेक्का लिएको हुँदा बडातेडीले निर्माण गर्न नसकेको हो । काम गर्नका लागि ठेकेदारलाई पटकपटक तोकता गरेपनि काम नगरेको इञ्जिनियर खड्काले बताए । तर, शारदाका प्रधानाध्यापक रेग्मीले उपमहानगरपालिकामा पटकपटक भवनको काम गराइदिन अनुरोध गरिए पनि उपमहानगरपालिकाले सुनुवाई नगरेको बताए ।

तर, बडातेडी डुणे कन्स्ट्रक्सन प्रालिका सञ्चालक मुकेश बोगटीले धनगढी उपमहानगरपालिकाले काम गरेको बिलको भुक्तानी नदिएकाले काम गर्न नसकिएको बताए । उनले असारमा पेश गरेको बिलको भुक्तान अझै नपाएको हुँदा आर्थिक अभावकै कारणले गर्दा बाँकी काम गर्न नसकिएको बताए ।